Apeqqutit akissutaallu

Kommuni ViSO-mut saaffiginninngitsoorsinnaava, namminerlu FKU-mik sanalluni, misiliinernik atuinngikkunik?
Aap. Kommunip nalilerpagu, tarnikkut misilitsinnerit assigiissaakkat atunngikkaluarlugit suliaq naammattumik erseqqissarneqarsinnaasoq, taava kommuni VISO-mut saaffiginnittariaqanngilaq qulaajaanissaq siunertaralugu, VISO-mi taamaallaat qulaajaasoqartarmat, misissuinerit naliliinerilluunniit ilaannik, tarnikkut misilitsinnerit assigiissaakkat atorlugit suliarineqarsimasunik. Nalorniguit, kaammattussavatsigit uagut saaffigeqqulluta.

Immikkoortortap immikkut ittup qulaajaanerata kommunimi FKU taarserpaa?
Naamik, taamaanngilaq. Immikkoortortaqarfiup qulaajagassarai, angajoqqaatut pisinnaasat pillugit misissuinerup immikkoortortai, tarnikkut misilitsinnerit assigiissaakkat atorlugit qulaajarneqarsimasariaqaraluartut. Tamanna takuneqarsinnaavoq meeqqap inatsisaani § 171 b-mi. Taamaalilluni immikkoortortaqarfiup qulaajaanera suliaq pillugu kommunip paasissutissaataanut tapiliussatut ilanngunneqassaaq.

Qanoq iliorlusi innuttaasup eqqarsartaatsikkut pissusaa nalilersorsinnaavisiuk tarnikkut misilitsinnerit assigiissaakkat atornagit?
Kommunip aamma immikkoortortameersup immikkut ilisimasallip suliamut aalajangersimasumut atatillugu tamatigut nalilertarpaat, suna qulaajarneqassanersoq. Innuttaasup eqqarsartaatsikkut pissusaanik qulaajaaneq pissaaq, suliamut immikkut ilisimasalik tarnikkut ilisimasaqartutut tunuliaqutaqartumik suleqateqarnikkut. Qulaajaaneq pisassaaq paasissutissat assigiinngitsut atorlugit, assersuutigalugu suliaq pillugu paasissutissani pioreersuni paasissutissat, aaqqissuussamik aaqqissuussaanngitsumillu malinnaanerit aamma meeqqamik, inuusuttumik, angajoqqaanik imaluunniit angajoqqaanngortussanik, imaluunniit ilaqutariit attaveqaatigisaannik allanik apersuineq aqqutigalugu.

Angajoqqaatut pisinnaasat pillugit misissuineq saniatigut kommunimit namminermit suliarineqassava? Aamma sumik imaqassava?
Kommuni nammineerluni FKU-mik suliaqartussaavoq, suliamut atatillugu paasissutissiornermi tamanna pisariaqartinneqarpat. Immikkoortortamit immikkut ittumit qulaajaaneq tapertatut isigineqassaaq, FKU-p immikkoortortaasa ilaannik akissuteqartussaq, tarnikkut misilitsinnernit assigiissaartunit akineqarsimasariaqaraluartunik.

Taavami qanoq pisoqassava kommunip tarnip pissusaanik ilisimasalittaa VISO-lu isumaqatigiinngippata imaluunniit assigiinngitsunik inerniliippata?
VISO-mit qulaajaaneq kommunip aalajangernissamini tunngavissaanut ilaassaaq isigineqassallunilu ilisimasaqarfiit arlaliusinnaasut ilaattut. Ima pisoqarsinnaavoq, ilisimasaqarfiit assigiinngitsut paasissutissanik assigiinngitsunik imminnulluunniit akerleriittunik tunniussisut, kommunili tassaavoq inaarutaasumik aalajangiisussaq, misissuineq tamarmiusoq tunngavigalugu.

FKU-mut najoqqutassat inuiaassutsimut tunngasut allanngorpat inatsisip allanngorneranut atatillugu?
Aap, allanngorput. Angajoqqaatut pisinnaasat pillugit misissuinernut najoqqutassanik suliaqarnermi qanorlu atorneqarnissaat pillugit najoqqutassat

Kommunip qulaajaanissamik noqqaaneraniit naammassineqarnissaata tungaanut piffissaq qanoq sivisutigissangatinneqarpa?
Tamanut atuuttumik suliamik suliarinninnerup qanoq sivisutiginissaa oqaatigisinnaanngilarput, sulianut ataasiakkaanut pissutsit apeqqutaajuaannarmata, ilaatigut suna misissorneqassanersoq aamma assersuutigalugu inuit qassit misissuinermi ilaatinneqassanersut. Sapinngisamik pilertortumik qulaajaanerup suliarineqarnissaa sulissutigissavarput. Ilisimatitsissutigisinnaavarput, suliani tamakkunani aamma kommuni oqartussaasutut akisussaasuummat, suliamik sullissinermi piumasaqaatit atuuttut malinneqarnissaannut akisussaalluni, soorlu meeqqap inatsisaa imaluunniit inuusuttut pinerluuteqartarnerat akiorniarlugu inatsit malillugu, meeqqanut inuusuttunulluunniit suliamut atatillugu misissuinerit suliarineqarneranni piffissaliinerit eqqarsaatigalugit.

Qanoq iliorluta suliat kommuniniittut nassaariniassavagut? Tassami inuit inuiaqatigiinnit sorlerneersuunerat nalunaarsorneq ajorparput?
Suliat nassaarineqarnissaat assersuutigalugu pisinnaavoq meeqqat inuusuttullu pillugit siunnersortit suliamik aalajangersimasumik malitseqartitsineranut atatillugu, ilaqutaasut saqqummiivigineqarsinnaallutik suliamik qimerluueqatiginissaannik aamma kommuni suleqatigalugu isummerfigalugu, suliamik qimerluueqatiginissaannut atatillugu akuersiumanersut. Kaammattuutigaarputtaaq, kommunit eqqumaffigissagaat inatsit nutaaq, taannalu pillugu meeqqat inuusuttullu pillugit siunnersortit ilisimatinneqarnissaat.

Assersuutigalugu PPR-imi imaluunniit Børnehus-imi misilitsinnerit atorneqarsimappata, taava suliat qimerlooqqullugit nassiunneqassappat?
Kommunip suliat nassiutissavai, misilitsinnernik atuiffiusimasut, aamma taakku kommunip naliliineranut ilaappata, angerlarsimaffiup avataanut inissiinissamut atatillugu. Tamanna atuuppoq, misilitsinnerit PPR-imi, Børnehus-imi pisortaqarfinniluunniit allani suliarineqarsimanerat apeqqutaatinnagu. Suliani tamakkunani kommunip FKU/tarnikkut misissuineq, meeqqamut tunngatillugu suliamik misissuineq aamma inassuteqaat, kiisalu Meeqqanut inuusuttunullu ataatsimiititaliap aalajangiinera nassiuttussaavai. Suliaq nassiutissallugu tulluartuunersoq nalornissutigigukku, taava kaammattorusuppatsigit oqarasuaatikkut pingaartorput attavigeqqullugu.

Ingerlatsiviup qanoq iliorluni nalilertarpaa, misilitsinneq eqqunngitsumik naliliisitsinermik kinguneqarsimanersoq?
Immikkoortortap suliamut paasissutissat pineqartut misissussavai, ilanngullugu misilitsinneq kommunip aalajangiineranut qanoq sunniuteqarsimanersoq. Immikkoortortap misilitsinnerup imarisaa inerniliussineralu sanilliutissavaa kommunip misissuineranut nalilersuineranullu, kalaallit kulturiat oqaatsitigullu paasinninneq eqqarsaatigineqarsimanersut pillugu.

Misilitsinnerit sorlerpiaat-uku atorneqaqqusaanngitsut?
Inatsimmi naqissuserneqarpoq, tarnikkut misilitsinnerit assigiissaartumik tunngavillit atorneqassanngitsut, kalaallit oqaasiinut kulturiannullu tulluarsagaanngimmata. Misilitsinnerit atorneqaqqusaanngillat pissutigalugu, misilitsinnermi inernerit pissutsinik qulaajarneqarusuttunik eqqortumik tutsuiginartumillu takutitsinngeratarsinnaammata. Suliamik ilisimasaqaruit, ilisimasaqarfinnik allanik atuiffiusimasumik misilitsinnermullu assigusinnaasumik, imaluunniit suliamut atatillugu periaatsimik atuinissat nalornissutigigukku, taava kaammattorpatsigit immikkoortortamut immikkut ittumut attaveqaqqullutit.

Tarnikkut assigiissaakkamik misilitsinneq sunaana?
Assigiissaakkamik tunngaveqarluni tarnikkut misilitsinneq misissuinermi periaasiuvoq, assigiissaarinermik tunngavilik atorneqaraangamilu inerneri naleqartinneqartarlutik immikkoortitikkalluunniit ilaannut inissinneqarsinnaallutik, pitsaassutsinut ileqqunulluunniit sanilliunneqarsinnaasunngorlugit. Misilitsinnerit taamaattut assigiissaagaapput atorneqarnerinilu nalilerneqarnerinilu sanilliukkuminartuussallutik, matumanilu apeqqutaanngilaq meeqqat angajoqqaalluunniit misilitsippata. 

Meeqqat inersimasullu sorliit immikkoortortap sullitassarai?
Suliat matumani pineqartut, meeqqanut, inuusuttunut, angajoqqaanngortussanut imaluunniit angajoqqaatut oqartussaassuseqartunut, Kalaallit Nunaanni inunngorsimasunut peroriartorsimasunulluunniit imaluunniit kalaallit oqaasiinut, kalaallit kulturiannut kalaallillu naleqartitaannut qanittumik atassuteqartunut, tunngasuupput.

Qanoq iliussaagut, meeraq/inersimasoq Kalaallit Nunaanni inunngorsimanngippat peroriartorsimanngippalluunniit, kisiannili oqarluni kalaallit kulturiannut naleqartitaannullu qanittumik atassuteqarluni kissaatigalugulu immikkoortortap kalaallit oqaasiinik kulturiannillu immikkut ilisimasaqarfiup akuutinneqarnissaa?
Kaammattuutigaarput meeraq/inersimasoq attavigissagissi annertunerusumik paasisaqarfigiumallugu, pineqartup peroriartornermini Kalaallit Nunaannut attaveqarnera sunarpiaasimanersoq. Oqaloqatigiinnerup tamatuma kingorna, kulturikkut oqaatsitigullu atassuteqartoqarnera nalornissutigigussiuk, taava kaammattuutigaarput immikkoortortamut attaveqaqqullusi. Inatsit imaappoq, kommunip nalileruniuk, innuttaasoq Kalaallit Nunaannut atassuteqartoq, taava kommuni immikkoortortamut saaffiginnissaaq. Immikkoortortaq suliami aalajangersimasumi aalajangiissaaq, meeraq/inersimasoq inatsisip atuuffissaanut ilaanersoq.